ForumMartin blessé, coup dur pour le RFCT
07/09/2010 - Suite à sa mauvaise chute lors du match face à Tienen, Christophe Martin sera écarté des terrains pour trois mois.Le... (Suite)
Radotaches - Par eul trieo du Cabaret
L’déclic…puteôt qu’des claques… !
Bonjour, savez, mes gins.
Je n’sais pos ç’que vous in pinsez mais pour mi l’match de ç’soir ch’t’ein des pus importants qu’on a jeué d’puis lonmint !
Vous allez m’dire que dins l’situatieon qu’on conneot asteur, tous les matches i l’seont, je n’dis pos, mais ç’ti-chi, ch’n’est pos l’même.
D’abord pasque l’équipe d’in face, Boussu Dour Borinage, on deot acor l’rinqueontrer deux queops. Cha veut dire qu’on peut acor leu printe six points. Bin seûr, ch’est dins l’meilleu des cas. Après i-a l’match à Wetteren sam’di au soir. Imaginez ein p’tit queop qu’on gan’reot les deux, l’équipe elle s’reot infin sortie d’ceulle mauvaisse passe.
Et vous savez ç’qui m’fait dire cha ? Ch’est après ç’qu’on a vu cont’ l’Antwerp ; on n’a pétête pos gagné mais on a vu eine beonne équipe tournaisienne et ch’est cha qui deot nous r’deonner espoir.
Pou ç’qu’i-est d’l’intraineu, j’sais bin qu’on m’dira qu’on areot d’vu réagir pus vite. Mais on sait que l’critique elle est facile et souvint les conseilleux i n’seont pos les payeux…
Personnell’mint, j’trouèfe que Christophe Denie i-a fait du beon traval au FC et qu’i n’est pos responsape de tout ! Cha s’reot trop facile, ch’n’est tout n’même pos li qui jeue !
Infin asteur, i feaut orpartir du beon pied avec el ceu qui va v’nir et espérer qu’cha tourne bin vite pour ormeonter au class’mint et rasseurer ainsin tous les supporters de l’régieon Pasqu’ i n’feaut quand même bin pinser qu’asteur, on est l’prumier Clup de l’Wallonie Picarte ! Et personnell’mint j’espère bin qu’on l’restera eine beon momint.
Vous voirrez qui n’faudra pos attinte lonmint pour que no n’équipe elle ortrouèfe des couleurs. Pour cha i suffireot que l’chance elle ne li tourne pus l’deos et alors là, vous voirrez queus nouvelles ! Les éautes i n’areont qu’à bin s’ténir. Mais ç’qui feaut surtout avant cha, ch’est qu’on n’les laiche pos caire et qu’on soiche toudis derrière les dirigeants, les jeueux et l’intraîneur.
Pasqu’ein clup, on ne l’supporte pos seul’mint quand i gagne, éné ?
Allez, à r’voir mes gins et à l’feos qui vient
L’Infant d’Tournai
Partager sur Facebook
Partager sur Twitter 